വൈദ്യുതി ബസ്സിനു പിന്നാലെ വൈദ്യുതി റോ റോ യും

വൈദ്യുതി ബസ്സിനു പിന്നാലെ വൈദ്യുതി റോ റോ യും

 ജലഗതാഗത വകുപ്പ് രാജ്യത്തെ തന്നെ ആദ്യ വൈദ്യുത റോള്‍ ഓണ്‍ റോള്‍ ഓഫ് (റോ റോ) സര്‍വ്വീസുമായി എത്തുന്നു. ജങ്കാര്‍ പോലെ യാത്രക്കാര്‍ക്കൊപ്പം വാഹനങ്ങളും വഹിക്കുന്ന സംവിധാനമാണ് റോ റോ. വൈക്കം-തവണക്കടവ് റൂട്ടിലായിരിക്കും ആദ്യ സര്‍വ്വീസ് നടത്തുക. പരീക്ഷണാടിസ്ഥാനത്തില്‍ ആദ്യം ഒരു സര്‍വ്വീസ് ആണ് തുടങ്ങുന്നത്. റോ-റോ കൊച്ചി കപ്പല്‍ശാലയില്‍ നിര്‍മിക്കാനാണ് ഉദ്ദേശിക്കുന്നത്. റോ റോയ്ക്ക് വലിയ ബോട്ട് തന്നെ വേണമെന്നതിനാല്‍ കൊച്ചി കപ്പല്‍ ശാലയില്‍ മാത്രമാണ് ഇതു നിര്‍മ്മിക്കാന്‍ സംവിധാനങ്ങളുള്ളത് . സര്‍ക്കാര്‍ കഴിഞ്ഞ ബഡ്ജറ്റില്‍ പ്രഖ്യാപിച്ച പദ്ധതിയാണ് ഇപ്പോള്‍ നടപ്പാക്കുന്നതെന്ന് ജലഗതാഗത വകുപ്പ് ഡയറക്ടര്‍ ഷാജി വി നായര്‍. സംസ്ഥാന റോഡ് ട്രാന്‍സ്പോര്‍ട്ട് കോര്‍പ്പറേഷന്റെ വൈദ്യുത ബസ്സുകള്‍ക്കും സര്‍ക്കാര്‍ ഉടമസ്ഥതയിലെ തിരുവനന്തപുരം ആറാലുംമൂട്ടിലുള്ള കേരള ഓട്ടോമൊബൈല്‍സില്‍ അതിവേഗം നിര്‍മാണം പുരോഗമിക്കുന്ന ഓട്ടോറിക്ഷകള്‍ക്കും പിന്നാലെയാണ് പുതിയ നടപടി .

പഠനം ഏപ്രിലില്‍ തുടങ്ങും.പഠനം പൂര്‍ത്തിയാക്കി തുക നിശ്ചയിച്ചാല്‍ ഉടന്‍ ടെന്‍ഡര്‍ ക്ഷണിക്കും. സ്ഥലങ്ങളുടെ പ്രത്യേകതയും യാത്രക്കാരുടെ തിരക്കും ബോട്ടിന്റെ കാര്യക്ഷമതയും സംബന്ധിച്ച്‌ വിശദമായപഠനം നടക്കേണ്ടതുണ്ട്.വിദേശരാജ്യങ്ങളെ ആശ്രയിച്ചാല്‍ അത് വന്‍ സാമ്ബത്തിക ചിലവിലേക്ക് പോകുന്നതിനാലാണ് കൊച്ചി കപ്പല്‍ശാല ആദ്യ പരിഗണനയിലുള്ളത്. റോ-റോ സര്‍വ്വീസ് വൈദ്യുതിയില്‍ പ്രവര്‍ത്തിപ്പിക്കുന്നതിലൂടെ സര്‍വ്വീസിന്റെ ചിലവ് ഗണ്യമായി കുറയുമെന്നതാണ് പ്രധാന നേട്ടം. നിലവില്‍ മെക്കാനിക്കല്‍ സംവിധാനമാണ് റോ റോയ്ക്കുള്ളത്. സര്‍വ്വീസ് വലിയ നഷ്ടത്തിലുമാണ്.ക്ഷമത കൂടിയ എഞ്ചിന്‍ ആവശ്യമായത് കൊണ്ടുള്ള അമിത ഇന്ധനച്ചെലവാണ് പ്രധാന കാരണം. വൈദ്യുതി സംവിധനത്തിലേക്ക് മാറുന്നതോടെ മെക്കാനിക്കല്‍ സംവിധാനത്തെ അപേക്ഷിച്ച്‌ അറുപത് ശതമാനത്തിലേറെ പ്രവര്‍ത്തനച്ചെലവ് കുറയും. ജീവനക്കാരുടെ എണ്ണത്തിലും കുറവ് വരുത്താം. സര്‍വ്വീസ് വിജയകരം എന്നു കണ്ടാല്‍ മറ്റു റൂട്ടുകളിലേക്ക് വ്യാപിപ്പിക്കുവാനും ജലഗതാഗത വകുപ്പിന് പദ്ധതിയുണ്ട്.