പുൽവാമ സൈനികരെ അപനിച്ചതായി പരാതി കാസഗോഡ് കോളേജ് വിദ്യാർത്ഥിക്കെതിരെ കേസ്

പുൽവാമ സൈനികരെ അപനിച്ചതായി പരാതി കാസഗോഡ് കോളേജ് വിദ്യാർത്ഥിക്കെതിരെ കേസ്

കാസർഗോഡ്: പുൽവാമയിൽ ഭീകരാക്രമണത്തിൽ കൊല്ലപ്പെട്ട സൈനികരെ അപമാനിച്ച് ഫേസ്ബുക്കിൽ പോസ്റ്റിട്ടെന്ന പരാതിയിൽ കേന്ദ്രസർവ്വകലാശാല വിദ്യാർത്ഥിക്കെതിരെ രാജ്യദ്രോഹ കുറ്റം ചുമത്തി പോലീസ് കേസെടുത്തു. പെരിയ കേന്ദ്രസർവ്വകലാശാലയിലെ രണ്ടാം വർഷ എം എ ഇന്റർനാഷ്ണൽ റിലേഷൻസ് വിദ്യാർത്ഥിയും ആന്ധ്രാ സ്വദേശിയുമായ അവ്ലാ രാമുവിനെതിരെയാണ് ബേക്കൽ പോലീസ് ജാമ്യമില്ലാ വകുപ്പ് ചുമത്തി കേസെടുത്തിരിക്കുന്നത്.

അതേസമയം, പുൽവാമ ആക്രമണത്തിനു ശേഷം പാകിസ്ഥാന് ജയ് വിളിച്ച് ഫേസ്ബുക്കിൽ പോസ്റ്റിട്ടതിന്റെ പേരിൽ കർണ്ണാടകയിൽ അധ്യാപികയെ ഞായറാഴ്ച അറസ്റ്റ് ചെയ്തിരുന്നു. കർണ്ണാടകയിൽ പഠിക്കുന്ന കശ്മീരി വിദ്യാർത്ഥിയും പാകിസ്ഥാന് അനുകൂലമായി ഫേസ്ബുക്കിൽ പോസ്റ്റിട്ടിരുന്നു. സുരക്ഷാ സേനയെ കുറ്റപ്പെടുത്തി ഫേസ്ബുക്കിൽ പോസ്റ്റിട്ട കോളജ് അധ്യാപികയെ സസ്പെന്റ് ചെയ്തിട്ടുണ്ട്. ഗുവാഹത്തിയിലെ ഐക്കൺ സ്കൂളിലെ അധ്യാപികയായ പാപ്രി ബാനര്‍ജിയെയാണ് സസ്പെന്റ് ചെയ്തത്.

2500ഓളം സൈനികരുമായി പോയ വാഹനവ്യൂഹത്തിനു നേരെ ഫെബ്രുവരി 14നാണ് പുൽവാമയിൽ ആക്രമണം ഉണ്ടായത്. ഏകദേശം 60 കിലോയോളം ഭാരം വരുന്ന സ്ഫോടകവസ്തുക്കളുമായി ജയ്ഷെ മുഹമ്മദ് ഭീകരൻ വാഹനവ്യൂഹത്തിന് മധ്യഭാഗത്തായി പോകുകയായിരുന്ന ബസിനു നേര്‍ക്ക് വാഹനം ഇടിച്ചു കയറ്റുകയായിരുന്നുവെന്നാണ് റിപ്പോര്‍ട്ടുകള്‍. സംഭവത്തിൽ നിരവധി വാഹനങ്ങളും തകര്‍ന്നു. പുല്‍വാമയിലെ കാകപൊര സ്വദേശി ആദില്‍ അഹ്‍മദ്‍ എന്നയാളാണ് തീവ്രവാദിയെന്ന് പോലീസ് സ്ഥിരീകരിച്ചിട്ടുണ്ട്. ഇയാള്‍ 2018ല്‍ ആണ് ജെയ്‍ഷ്‍-മൊഹമ്മദില്‍ അംഗമായത്.